Het is in de Achterhoek gebruikelijk een meiboom te plaatsen als van een nieuw gebouw het hoogste punt bereikt is. Voor het dak dicht is gemaakt, wordt een dennenboom uit een bos gehaald door bijvoorbeeld de naobers of buren of vriendengroepen.Van de boom worden de meeste takken weggehaald en uiteindelijk blijft de stam met de groene top over. Soms wordt er een krans gemaakt van de overgebleven takken, deze krans wordt boven in de meiboom gehangen.Met de naobers wordt de boom in het donker bij het hoogste punt geplaatst en op een later tijdstip wordt er zeer uitbundig geklonken op een voorspoedige toekomst.
Meiboom zetten is een old gebroek, dat hier in de streek gelukkig nog regelmaotig veurkump. In de buurte gaot de geruchten, dat d'r ene 'n stukke bi-j d'n ligboxenstal an wil zetten. D'r wordt al ne zet ovver epraot, maor ton d'r in de krante ston, dat d'r vergunning was an evraogd veur oetbreiding van ne ligboxenstal, zol 't dan wal ne kaere zowiet wezzen. Endelukke, nao 'n aantal maonden kump d'r ne grote krane, den kelders begunt oet te graven, een groot gat en ne groten hoop zand greujd d'r op d'n bouwplas. Vrachwagens met stene, holt en platen veurt af en an en 't schöt al duftig op, ene van de beide naoste naobers hölt de bouwaktiviteiten good in de gaten want vèur at de platen d'r op ligt, mot d'r ne meiboom bi-j ezat worden deur de naobers.
Dan op ne dag wordt d'r rond ebeld: "Vanaovend meiboom zetten"! Ene van de naobers, den ne bos hef, is zo vrendeluk ne mooien langen boom beschikbaor te stellen, den boom wordt bi-j dagens lech al oet ezocht, 's aovends völt 't vake teggen umme d'r ene oet te zeuken met ne mooien top d'r in. 't Is al wal gebeurd, dat d'n boom 's aovends nog oet ezocht mos worden, maor at e dan dale lag, veel 't slim teggen, d'n top was t'r oet of d'n boom was zo krom, dat e met good fatsoen neet as meiboom ebroekt kon worden. Op 't leste laggen d'r dan twee of dree beume, waor d'r gin ene good van was, nae, baeter was d'n boom ovverdag al an te tekenen, dan was daor 's aovends niks meer met te doone. "'s Aovends nao 't journaal van acht uur bi-j mekare kommen bi-j d'n naosten naober, gereedschap met brengen"! De vrouwleu van de beide naoste naobers heurt t'r ok bi-j. De mansleu hebt allemaole de olde klaere an, ne zage, biele, schuppe, halterstrank of ne zaklöchte bi-j zich. De vrouwleu hebt grei, umme reuskes te maken, dee straks ok in d'n top van d'n meiboom vaste emaakt wordt en vleegertouw, umme de läöge flessen met in d'n boom te hangen. Ene van de mansleu hef ne zwaoren trekker met ne groten olden melkwagen met enommen, daormet zal d'n boom vervoerd worden.
Nao twee köpkes koffie en aevenvölle borreltjes maakt de mansleu anstalten umme naor d'n bos te gaon, de vrouwleu begint an de reuskes. De mansleu kroept bi-j mekare in 'n paar auto's, d'n trekker met d'n groten melkwagen kump d'r achteran en met tien minuten steet 't gezelschap bi-j d'n bos waor d'n meiboom oet mot kommen. D'n trekkerchauffeur veurt d'n groten wagen achteraers de hegge in, dee op d'n bos angeet. Dat völt neet met en hee zit 'r al watties met in ne graven en teggen ne stroomdraod, den gelieke op vief plaatsen van de pöste af erukt wordt. D'n trekker op zich is stark zat umme d'n groten wagen d'r waer oet te trekken, allene d'n graven is luk oet fatsoen, daor mot d'n chauffeur d'n anderen dag maor waer hen met de panne umme liekigheid te kriegen en ok de afrastering zal waer in odder emaakt motten worden.
't Is tameluk duuster in d'n bos, de zaklöchten gaot an en nao efkes zeuken is d'n boom, den 't worden zal, evonnen. Sommigen vindt 'm te kort, anderen te lang, te dikke of te dunne, d'r wordt nog naor baetere exemplaren ezocht maor op 't leste wordt toch de biele ezat in d'n boom, den d'n zelfden meddag is an etekend. D'n boom völt, tekkere knapt, mansleu springt opzied en d'n boom wordt nogmaols ekeurd in 't schiensel van de zaklöchten. 't Völt met, d'n top is d'r in eblevvene en d'n boom is wal zowat vieftien meter lang. De ziedtekkere wordt d'r af eslagene en dan begunt 't gestangelte umme d'n boom 't bos oet te kriegen. Ummedat neet alle mansleu aeven groot bunt, draegt de grootsten de zwaorste last, ne enkelen kleinen man löp vlak achter ne groten, dèn kan dus haoste neet bi-j d'n boom umme te helpen draegen, ne anderen beperkt zich veurnameluk tut ’t bi-jschienen met de zaklöchte. In ne riege beurt de mansleu d'n boom d'n bos oet naor d'n groten melkwagen, daor wordt e met 'n paar halterstrenge op vaste emaakt en dan geet 't in optocht naor d'n naosten naober, waor de vrouwleu al zit te wachten. D'n olden melkwagen met d'n boom wordt zó naer ezet, dat e good in de gaten ehollne kan worden. 't Zol neet de aerste kaere wezzen, dat grappenmakers d'n boom stiekum middendeur zagen, at dat gebeuren, kon 't gezelschap veur de tweede kaere naor d'n bos en dan kon 't dèn aovend wal 's ampart late worden.
De flessen, dee bovven in d'n boom komt te hangen, mot aerste läög emaakt worden, gin mense vindt dat onplezerig wark. De vrouwleu vindt dat 't tied wordt umme d'n meiboom te zetten en nemt de läöge flessen en de reuskes met, de mansleu loopt waer in dezelfde volgorde met d'n boom naor de ni-jbouw an d'n ligboxenstal. Twee laeren hebt de mansleu bi-j zich, dee bunt neudig bi-j ’t opzetten van d'n boom. D'n alcohol hef ziene oetwarking neet emist, 't hele stel kö'j al van de wiedte an heuren kommen. Bi-j d'n stal wordt d'r aerste ovvernaerd, waor d'n meiboom mot kommen en dan wordt d'r deur d'n aktiefsten een gat van een meter of anderhalf deepe egravene. Mensenkinder, wat 'n puun zit 'r in de grond! Met reuskes en läöge flessen wordt d'n boom versierd. Ne planke wordt d'r op 't ende in 't gat ezet en langzaam wordt d'n boom teggen de planke an met de onderkante in 't gat eschovvene.
Ums te beurten wordt de beide laeren as stutte ebroekt en nao enigen arbeid steet d'n boom as 'n hoes, hee stek wal vief meter bovven d'n nok van d'n stal oet. Nao de grond rond umme d'n stam nog duftig te hebben an estampt, geet iederene naor hoes hen, de meesten hebt eur eigen gereedschap ok nog waer können vinden in d'n duusteren.
At later d’n ni-jbouw helemaol klaor is, wordt d'r deur d'n eigenaar ne gezellige meiboomvisite egevven, waor noo alle vrouwleu ok bi-j heurt. De ni-jbouw wordt oetvoerig bekekkene en de boeren onder de mansleu könt noo ok mooi effen 't vee van d'n buurman bekieken, dat wieter in d'n stal löp. An 't ende van d'n aovend wordt d'n buurman met zien gezin völle succes ewenst met de oetbreiding van d'n ligboxenstal en allemaole hopt ze dat d'r ze laeven nog völle meibeume ezat mot worden in de buurte.
Bekijk het fragment uit onze tv-uitzending over dit verhaal:
